(بنت الزبال) هيك كانوا ينادوني بالمدرسة بالحارة بكل مطرح نسيوا اسمي و ظلوا ينادوني بنت الزبال
أبي كان عامل بالبلدية وكنا ساكنين ببيت بسيط بمنطقة بسيطة اسمها(نبعة)ما كنا ناكل زبالة متل ما كان ينحكى علينا كنا عيلة متل اي عيلة نطبخ ونسهر ونضحك سوا تلات صبيان وبنتين انا أكبرهم.
بالمدرسة ما التفتوا لشطارتي وتفوقي شافوني بس بنت الزبال.بالصف قلال كتير اللي يحكوا معي وكتار منهم يخجلوا يقعدوا حدي او يمكن يقرفوا بيفكروني ما بتحمم او ريحتي زبالة
و لما سألتني المعلمة شو حلمك بس تكبري ردت بنت من ورائي ((حلمها تلم الزبالة)) وضحكوا كلهم بس انا بكيت.
ضمتني معلمتي لصدرها وهمست بأذني لا تزعلي ولاتخجلي من شغل ابوكي من زمان أنا ابي كان يشتغل ناطور بناية ويشطف الدرج و يلم التياب القديمة ونلبسها ونفرح فيها كمان كوني قوية.
اي رح كون قوية هيك قررت ما رح اضعف ما رح خلي حدا يضحك عليي علّمت اخواتي يكونو أقوى مني علمتهم انو لازم ما نضعف وما نسمح للزمن يكسرنا
مرت سنين طويلة ونجحت بالبكالوريا
وتفوقت الحمد لله ودخلت كلية الطب وهون تغيرت صاروا ينادوني إجت الدكتورة وراحت الدكتورة.
حسيت اني عم أطير فرحت بحالي و كأني كسرت كل شي كان قاهرني كل الي ضحكوا عليي اجى وقت واحتاجوني و الله بيعلم اني ما قصرت بحق حدا منهم.
كبرت و كبرو اخواتي تغيرت الأحوال وأبي ما عاد بحاجة يشتغل غيرنا بيتنا وضلينا ايد واحدة اخواتي الشباب اثنين مهندسين والتالت عم يدرس طب أسنان واختي بكلية الصيدلة وأنا تزوجت وصار عندي ولدين واخواتي منهم خاطب و منهم متزوج الله يوفقهم بعمرهم بس ما ممكن ننسى انه بيوم من الايام كان اسمنا ولاد الزبال.
أبي اللي كانت هالكلمة تدبحه اكتر منا بس نحنا ما نسينا فضله ولا خجلنا فيه المهم ربانا عاللقمة الحلال.
أبي اللي بكي وقت قلتله ما حدا عم يقبل يقعد جنبي بالصف
علموا أولادكــم يكونوا حناين و لا يقسوا قلوبهم اذا الزمن قاسي
استاذة طب الاعصاب بجامعة حلب..
د. رولا الأبيض