#تعميم مهم كتير❗️❗️❗️❗️
للأسف شفت بوست لأم بأحد الكروبات عم تستشير الامهات انو بنتها عندها بس حرارة ٣٩ وماعم تنزل بسهولة والطبيبة ما قبلت تستقبلها لانو الحرارة ما صرلها ٣ ايام ومو حالة طارئة والطبيبة ماعم تستقبل الا الطواريء بسبب فيروس كورونا
وأرسلت الام عالبيت مع خافض حرارة
اللي فاجئني غير كمّية التعليقات المسيئة للطبيبة اللي تصرفها أصلا صح لتقلل التجمعات بعيادتها بهالأزمة اللي عم نمر فيها واللي هوه أصلا لمصلحة الأم والطفلة ما يروحوا على عيادات ومشافي بلا داعي
اللي فاجئني وصدمني أكتر كمّية التعليقات من على نمط "الحرارة خطر اوعك! بتروح البنت من ايديكي! او بتنشل...او بتأثر الدماغ!!"
طبعاً هاد الكلام خطير وغير صحيح وبسبب اني سمعته كتير وجب إني أكتب هالمقال ووصّل المعلومة الصحيحة لكل الأمهات
هل #الحرارة خطر على طفلي؟
كيف أتصرف اذا أصيب طفلي بالحمّى؟
🔹الحرارة دليل صحة
🔹الحرارة دليل مناعة
🔹الحرارة = الجسم ادرك انو في التهاب بالجسم والمناعة شغّالة عم تحارب الالتهاب
🔹 الحالات اللي صار فيها شلل او تأثير عالدماغ او وفاة هي حالات خاصة ومعقّدة والضرر ما بصير من الحرارة نفسها بل لعدة عوامل.
🔹 الاختلاج الحراري ظاهرة مخيفة لكنها غير ضارة ولا تؤثر على الدماغ وتختفي من ذات نفسها قبل عمر ال٦ سنوات
🔹 الحرارة خطر فقط في حالة حديث الولادة من عمر 0-3 أشهر في هذه الحالة لا تعالج الحرارة في المنزل وتجب مراجعة الطبيب
🔹أعود وأكرر تحذيري من الاستعمال الاعتباطي للمضادات الحيوية، أرجوكم لا تعطوا الطفل مضاد حيوي بدون وصفة طبيب بمجرّد ارتفاع الحرارة، المضاد يستعمل فقط في حالة الالتهاب البكتيري وهذا يقرره فقط الطبيب.
❗️طيب دكتورة كيف بتصرّف لما طفلي يصاب بالحمى؟
🌺تحاميل براسيتامول وشراب بروفين بتبدلي بيناتن كل ٤ ساعات يعني هلا عطيتي تحميلة باراسيتامول بعد ٤ ساعات اذا لسا في حرارة بتعطي شراب وبعدا تحميلة وهكذا على مدار ٣-٥ ايام
🌺اذا عطيتي خافض والحرارة رجعت ارتفعت او ما نزلت كتير ولسا ما مرق ٤ ساعات
شو بتعملي؟
- بتحطي الطفل تحت الدوش مي فاترة
- بتخففي لبسه عطاق الداخلي
- لسا في حرارة؟ بتحطي كمادات تحت الابطين وبين الفخذين
وطبعاً ما بتعتمدي عاللمس بتقيسي دائما بمقياس الحرارة لانو ممكن تفكريه سخن بس تكون حرارته نزلت
❗️ايمتا ضروري تروحي عالطبيب او طواريء؟
- لما الطفل عن يحط ايده عاذنه، او ماعم ينام الليل عم يبكي كتير او دبلان كتير او ماعم يشرب سوائل ابدا اكتر من ٢٤ ساعة او عم يشكي من صعوبة بالبلع (التهاب اللوز) او ضيق تنفس
غير هيك غالب كريبات الاطفال فيروسية ومابدها غير سوائل كتير وخوافض وادوية للرشح اوالبلغم اذا في وبس.
اللهم بلّغت، اللهم فاشهد
دمتم وأطفالكم بالف خير🌺
#الطبيبة_هبة_النايف